هذا ما حدث في مكتب سي كمال بن عمر البارحة !

.·°·.¸{السـلام .·°·.¸{}¸.·°·.عـليـكم }¸.·°·

بــسم الله الــرحمـن الــرحيــم



اهلا بعائلتي الإفتراضية !



الحاجب كان في الكولوار، قدام البيرو متاع سي كمال !
سي كمال كان في البيرو يتفرج على ماتش الإفريقي والقيروان !
فجأة، سي كمال انتفض و كانه قرصته عقرب وصاح : يا حاجب !!
جا يجري مسكين عم الحاجب و ساقيه اعلى من راسو.
ـ تفضل سي كمال ناديتلي ؟
ـ مالا ناديت لعمتي؟ ملا مساطة فيك ! باهي اسمعني و حل وذنيك مليح !
ـ هاني نسمع سي كمال !
ـ الماتش فكرني في حاجة هامة ياسر لا زمك تعملها تو. تمشي للدبو متاع الجامعة و تهز زوز شكاير من الدواء اللي جابوهولنا الحبيبات !
ـ الدواء ؟؟؟؟
ـ تي الشكاير الخضر اللي في التركينة، اللي جابوهملنا الفيفا ضد الدودة متاع الڨازون!
ـ آه فهمتك ... حتى انا كنت نتفرج و قلت خسارة ما نداويهوش الڨازون ولا حالة ! اما يا سي كمال شكارتين اش مش يعملوا ؟
ـ علاه آش يعملوا ؟ يا خي انا عندي جنينة فرساي ؟ تي 500 ميترو شكارتين يڨدوهم !
ـ آه صار إنت تحكي على جنينة دارك مش تداويها ؟ حتى انا ما ابهمني في بالي....
ـ هيا من غير دوة و من حينك هز كميونة الجامعة و الزوز شكاير و كي توصل اعطيهم للجنان !
ـ حاضر سي كمال !
هو ما زال كي خرج من الباب متاع البيرو، و سي كمال زاد عيط ، المرة هذي التعييطة كانت متاع واحد مدري آش طلعلوا !
رجع اكا الحاجب يجري مسكين
ـ اللطف يا سي كمال ! ماو لاباس !
ـ عملها بيا الكليماتيزور هاو ظاهرلي تكسر و مش تسخن عليا الدنيا شبيك رانا الخمسة و نصف متاع القايلة ! كيفاه نعمل تو باش نكمل الماتش ؟
ـ ما لا الجوارات..... (قالها الحاجب بالشوية ...)
ـ نعم ؟ شنوة قلت ؟
ـ لا لا شيء يا سي كمال ! ونشه العرق اكا الحاجب! هاني في ثنيتي تو نتعدى لبجبوج نقيمو و نقلوا يجي يصلحهولك !
ـ إيه و فيسع ! و كان ما لقيتوش اشري واحد في يديك و يجيو تو يركبوه ! آه مالا كيفاه مش نتفرج على الماتش في هالسخانة !


ـ ما لا الجوارات كيفاه ؟ قالها الحاجب و تبسم تبسيمة ما يعرف سرها كان هو ! و مشى....